Mostrando postagens com marcador COMUNICACION. Mostrar todas as postagens
Mostrando postagens com marcador COMUNICACION. Mostrar todas as postagens

OC apoia a "Tejero"

. 26 de setembro de 2008
0 comentarios

Un visitante de OC deixou un comentario coas instruccións para colaborar co noso veciño "Tejero" e como desde este blog vamos apoiar incondicionalmente a Jose Antonio Castro na súa andadura mediatica, queremos que todos os nosos visitantes teñan claro como poden axudar a "Joselito de Oia".

Así que se queredes participar no programa!!!, e axudar o noso veciño Jose Antonio!!!!, podedes facer de tres maneiras distintas:

1ª) Enviar unha carta con voso nome, idade, teléfono, foto, profesion e explicando como eres e por que vos apeteceria participar no programa.O enderezo e: Aptdo de correos 74074 Madrid.

2ª) Chamando a este número de teléfono: 806 517 484

3ª) Enviando un correo electrónico cos mesmos datos expostos no 1º apartado a este dirección: granjero@cuatro.com

Colaborade co noso veciño!!!! ANIMADEVOS!!!!!

Despedido de Citroën busca noiva en televisión

.
0 comentarios

A inestabilidade laboral que vive Citroën empezou a aguzar o enxeño da clase traballadora. O camiño foi aberto por José Castro, natural de Oia e residente ocasional en Cartaxena. José Castro xa está concursando na nova aposta televisiva de Cuatro «Granjero busca esposa». O galego traballaba en Citroën ata fai uns meses, pero foi despedido. Foi entón cando se foi a traballar a un leira de Cartaxena, desde onde contactou co novo reality e foi elixido. Con 32 anos e cun aspecto tranquilo e apracible, Joselito (como lle chaman en Cartaxena) foi vítima da conxuntura económica, pero soubo afrontar a situación buscando novas opcións na súa vida. Agora exponse semanalmente ás votacións do público e espera atopar á muller da súa vida neste novo programa para empezar unha nova vida no campo.

«Granxeiro busca esposa» é un formato de gran éxito internacional cuxo propósito é ofrecer a seis granxeiros a oportunidade de pór fin á soidade do seu corazón. Para logralo, os protagonistas do programa buscarán á súa parella ideal entre un grupo de mozas cuxo principal anhelo é cambiar o seu estresante ritmo de vida urbanita por unha vida máis pracenteira. A través de nove capítulos, donos de grandes terras ou empresarios agrícolas lánzanse a atopar á muller dos seus soños nun reality que xa cativou a millóns de espectadores en varios países.


Vía> A Voz

O carril bici entre Baiona e A Guarda custará 11,7 millóns

.
0 comentarios

O Consello da Xunta autorizou onte á Consellería de Política Territorial o gasto de 9,3 millóns de euros na obra de mellora da seguridade viaria da estrada entre Baiona e A Guarda (PO-552).

O goberno galego aprobou igualmente a declaración de utilidade pública do proxecto e dispuxo a ocupación dos terreos necesarios para acometer a obra, o que permite iniciar as expropiacións de 433 leiras nos concellos de Baiona, Oia, O Rosal e A Guarda. Entre a obra, o custo das expropiacións (dous millóns de euros) e a reposición dos servizos afectados, Política Territorial investirá un total de 11,7 millóns de euros neste proxecto.

A reforma da estrada Vigo A Guarda Tui, no seu treito entre Baiona e A Guarda, acometerase ao longo de 27,6 quilómetros entre ambas as vilas e inclúe a realización de 11 cambios de sentido, zonas de descanso en nove deles, unha glorieta na Guarda e unha modificación do trazado da estrada para mellorar unha curva.

A obra inclúe a realización dun paseo litoral para os distintos usuarios, cuxa configuración se divide en dous treitos, en función das características do terreo.

No primeiro treito, ao longo de 2,6 quilómetros desde a saída de Baiona, a configuración da estrada entre o mar e os cantiis condiciona a actuación a unha ampliación das cunetas existentes na realización de gabias hormigonadas de seguridade.

Camiños

Desde este punto, no quilómetro 20, ata A Guarda, construirase un paseo que discorrerá paralelo á estrada polo lado do mar, aproveitando algúns treitos o trazado de camiños existentes.

A obra entre Baiona e A Guarda engádese ao proxecto xa en marcha de integración paisaxística e mellora da seguridade viaria entre Vigo e A Ramallosa (PO-325), que supón un investimento duns 30 millóns de euros en preto de 16 quilómetros de percorrido.

Ambas as actuacións serán complementadas por unha terceira, entre A Ramallosa e Gondomar (PO-340), de 5,7 quilómetros, para o que xa se está redactando o proxecto.
Todas estas actuacións de mellora de seguridade viaria e integración paisaxística impulsadas pola Consellería de Política Territorial e recollidas no Plan Vigo Íntegra suman 52 quilómetros de lonxitude.

Con estas actuacións, ademais de mellorar a seguridade viaria de todos os usuarios das vías, a Consellería ten como obxectivo incorporar espazos para uso público de todos os cidadáns.

O proxecto ten o obxectivo de humanizar o tramo da costa e non só mellorar a calidade de vida dos veciños da zona, senón tamén converter este lugar nun atractivo turístico en si mesmo.

Vía > A Voz

A CONSELLERÍA DE SANIDADE SOLICITOU LICENZA MUNICIPAL PARA A CONSTRUCCIÓN DUN NOVO CENTRO DE SAÚDE

. 12 de setembro de 2008
0 comentarios

Na páxina 65 do Boletín Oficial de Pontevedra nº 173, correspondente o luns día 8 de setembro, figura o seguinte edicto:

O I A

E D I C T O

Solicitou a Consellería de Sanidade-Sergas- Xunta de Galicia licenza municipal para a construcción dun novo Centro de Saúde no lugar A Riña 36, na parroquia de Oia, neste termo municipal.

Dita edificación ten unha superficie total construida de 745,00 m2. Cumprindo co disposto no parágrafo a), do número 2 do artigo 30 do Regulamento de Actividades Molestas, Insalubres, Nocivas e Perigosas de 30 de decembro de 1961, sométese a información pública polo período de dez días, con fin de que durante o mesmo, que empezará a contarse desde o día seguinte ó da inserción do presente edicto no “Boletín Oficial” da Provincia e no taboleiro de edictos do Concello de Oia, poidan examina-lo expediente, na Secretaría deste Concello, as persoas que dalgún xeito se consideren afectadas pola actividade que se pretende instalar e formular por escrito as reclamacións ou observación que estimen oportunas.

Oia, a 26 de agosto de 2008.

O Concelleiro de Urbanismo, Camilo González Giráldez.

Vía > InfoGauda

ISIDRO PÉREZ (FOTO PARÍS), PRESENTA UNHA MOSTRA DE FOTOGRAFÍAS NO CENTRO CULTURAL DA COMUNIDADE DE MONTES DE OIA

. 7 de agosto de 2008
1 comentarios

O Centro Cultural da Comunidade de Montes de Oia, amosa ata o día 15 de agosto de 2008, unha moi interesante mostra fotográfica retrospectiva do fotógrafo Isidro Pérez González (Foto París). Na exposición - que pode visitarse a partires das 4 da tarde, e os sábados e domingos durante todo o día -, podemos ollar unha visión moi variada da nosas entrañables xentes de Oia, O Rosal, A Guarda e mesmo de Tomiño e do Val Miñor, ainda que nesta ocasión, con presenza maioritaria de persoas naturais e veciñas do entrañable concello oiense.

Na exposición atoparemos desde a Banda de Música Unión Musical de Mougás - dirixida daquela, e durante moitos anos - polo mestre Alsirio Fernández. Nesa histórica institución cultural da parroquia de Mougás, formaban parte daquela, o pai - Caietano - e dous irmáns - José e Eleodoro - de Alsirio; ata o Oiense C. F.. Hai tamén una presenza notoria do monumento máis emblemático do concello oiense: O Mosteiro Cisterciense de Santa María de Oia, que fai cáseque 50 anos atopábase moito millor conservado que hoxendía. Na parte superior do claustro e tamén a carón da sillería do coro, ollamos o párroco D. Claudio Rodal Fandiño.

Nesa atractiva exposición que Isidro Pérez tivo a bén orgaizar para que tódalas persoas que así o desexen poidan disfroita-la, podemos ver unha moidedume de persoas coñecidas. Algunhas xa faleceron, outras ainda están entre nós. En calquer caso, a mostra é tamén como unha homenaxe os que xa non están, ainda que permanecen nas nosas lembranzas, e tamén os que daquela eran xóvenes e hoxendía son venerables avós.

Procesións (da Virxe do Mar, Padroeira de Oia; de San Xulián ou San Xián; de San Cosme e San Damián, Santa Calumbra,...; presididas por cregos que xa non viven e outros, como D. José Luís Portela Trigo, que ainda están en plena actividade pastoral; Primeiras Comuniós, vodas, banquetes nupciais caseiros e tamén en restaurantes como O Muiño, de Camposancos e no Pazo Santa Trega; mozas e mozos de Oia, do Rosal, da Guarda,..., todos eles robustos e fermosos; mozas - como unha irmá de Tito, do Batuque, Carmen a irmá do Sindo, o pandeiro, etc. - con bicicletas; veciños de Mougás, Pedornes, Arrabal, Chavella, Loureza, Mavia, Sanxián,...
Hai tamén fotografías de algún acto municipal que por atoparse o concello de Oia en obras, tivo lugar no Mosteiro de Oia. Presidido polos retratos de Francisco Franco Bahamonde e de José Antonio Primo de Rivera, e polas bandeiras - a nacional de España, a da Falanxe e a carlista - que daquela adoitaban empregarse nos eventos oficiais, ollamos o entón alcalde Miguel Blanco facendo uso da palabra, o secretario municipal e outros persoeiros, entre eles o gobernador civil de Pontevedra.

Hai fotografías de grupos musicais como Os Albariños, de O Rosal; Gabiño (pai) - tocando instrumentos de percusión -, e Jesús "O Cego" co seu acordeón; e tamén Los Bambinos, de A Guarda, con tódolos seus primeiros compoñentes ao completo. Tamén hai unha fotografía na que sai o propio Isidro Pérez - que foi gaiteiro e compoñente do grupo Os Terribles, de Donas - tocando seu acordeón Paolo Soprani.

Por todo iso, e moitos motivos máis que os visitantes poderán comprobar "in situ", a exposición de fotografías de Isidro Pérez González, no Centro Cultural de Oia, constitúe todo un acontecimento. Ademáis, todas aquelas persoas que queiran poden encarregar as copias das fotografías que desexen.

Desde Infogauda felicitamos o pobo de Oia pola súa altísima calidade humana, que para nós é un valor que distingue as entrañables persoas dese concello, e que está patente na dignidade que rezuman as fotografías de Isidro Pérez, e a este profesional da fotografía - hoxendía xa xubilado, pero activo no que respecta a este tipo de iniciativas -, nosa noraboa por achegarnos unha mostra do seu quefacer fotográfico.

Vía > InfoGauda

'A quen beneficia o plan acuícola?'

. 2 de agosto de 2008
0 comentarios

Tras o intento frustrado pola oposición do BNG esta semana, os ecoloxistas temen que a Consellaría de Pesca tente aprobar o polémico Plan Sectorial de Acuicultura de Galicia o 28 de agosto, no primeiro nConsello da Xunta despois das vacacións. Consultada por ANT sobre se o documento estará listo daquela, a Consellaría, nas mans do PSdeG, lávase as mans e indica que “non podemos predicir cando se vai aprobar”.

Con todo, Fins Eirexas, secretario de ADEGA, adianta que “probábelmente” organizarán mobilizacións en torno a esa data para meter presión ao Executivo e prolongar o “atraso dun ano que xa levan na tramitación”.

Mediación política na compra de terreos

As plataformas veciñais contrarias ás granxas, artelladas en 'Galiza non se Vende', denuncian que, malia que oficialmente todas as novas piscifactorías sairán a concurso, o certo é que detrás de cada proxecto hai unha empresa en particular. “Oficiosamente todas están dadas”, confirma Eirexas.

Os ecoloxistas argumentan que en varios casos os líderes políticos locais fixeron de intermediarios entre os veciños e as compañías nas negociacións polos terreos. Dende Adega poñen de exemplo ao ex-alcalde de Porto do Son, o socialista Ramón Quintáns, no proxecto de Baroña, xa desbotado pola oposición da Consellaría de Cultura.

Stolt, Pescanova e Isidro de la Cal

Das novas instalacións previstas coñécense tres promotores oficiosamente. Así, é a multinacional de orixe noruegués Stolt Sea Farm quen está detrás da granxa denominada 'Camelle', en Arou, no concello de Camariñas, na Costa da Morte. A firma coruñesa Isidro de la Cal é quen promove a construción na Laxe Brava, ao carón do Parque Natural de Corrubedo. Pescanova, a través da súa filial Insuíña, aposta pola única nova planta na provincia de Pontevedra, en Punta Orelludas, en Oia.

“Amigos do PSOE”

Manolo Santos, da plataforma Salvemos Laxe Brava, acusa á Consellaría de Pesca, promotora do plan, de favorecer os intereses de certos empresarios: “o plan do PP favorecía a Pescanova porque eran amigos seus, o do PSOE favorece a Stolt polo mesmo”, indica o activista.

Xosé Manuel Casais, da plataforma de Quilmas, acusa ao departamento que dirixe Carme Gallego de querer “expropiar tres millóns de metros para darllos a dúas multinacionais”. “Chegaremos até o final”, advirte Casais en referencia ás protestas contra o plan.

Catro peticións desoídas

Tanto Santos como Eirexas denuncia a “falta de diálogo” da Xunta. A Conselleira de Pesca nunca se dignou a falar con nós”, di o activista de Salvemos Laxe Brava. Segundo o secretario de ADEGA, até en catro ocasións solicitaron sen éxito xuntanzas con Carme Gallego.

ADEGA argumenta que o Plano foi deseñado “nas oficinas das empresas do sector, que se repartiron a torta da costa para despois pedirlla ao PP, que lles fixo un plano a medida”. En opinión de Fins Eirexas, a única diferenza do proxecto do PP co Plano reelaborado por Pesca é que “Pescanova non resultará tan beneficiada porque foron túzaros co goberno ao criticar que lles denegaran a planta de Touriñán, en Muxía”.

Vía > A Nosa Terra

Pedornes celebra a “II Festa Gastronómica do Caramuxo”

. 1 de agosto de 2008
0 comentarios

A Asociación Cultural “San Mamed” e a Asociación de Veciños “A Muruxeira” de Pedornes (Oia) organizan a II Festa Gastronómica do Caramuxo (Mincha ou Bígaro), coa colaboración do Concello de Oia, da Deputación de Pontevedra e dos veciños de Pedornes. Dita festa celebrarase os vindeiros días 2 e 3 de agosto a partir das 12 da mañá no terreiro de Pedornes (praza do Calvario) e pretende dar a coñecer un producto típico da nosa bisbarra e de exquisito paladar, que foi tradicionalmente consumido pola xente das poboacións ribeireñas, alomenos no Concello de Oia. Para elo, realizarase unha exposición das diferentes especies de caramuxos (molusco gasterópodo) presentes nas nosas costas (incluidas nos xeneros: Gibbula, Littorina e Monodonta), con información detallada relacionada coas características morfolóxicas, localización, alimentación ou reproducción, así como as súas cualidades gastronómicas. Incluiranse fotos, receitas de cociña e un acuario con varias especies vivas.

Ademais de ofrecer caramuxos gratuítamente, tódolos asitentes poderán degustar “Pulpo a Feira”, empanadas de caramuxos ou de pulpo, zorza ou chocos a prancha a prezos populares, nas mesas instaladas baixo unha gran carpa, habendo tamén un servizo de cantina que funcionará os dous días.

Ademais, o día 2 ás 12:00 inaugurarase o Centro Cultural de Pedornes, coa asistencia de autoridades e a actuación de varias agrupacións da comarca. A continuación, a festa seguirá animada polo Grupo “Airiños do Tamuxe”.

O día 3 a partir das 13:00 actuará de novo o Grupo “Airiños do Tamuxe”, e ás 19:00 terá lugar a actuación da Murga “Ultreia” de Santiago.

O BNG detén a aprobación do Plano Acuícola

.
0 comentarios

Finalmente a Xunta non aprobará o Plano Acuícola no Consello deste xoves, último antes das vacacións de Agosto. O Executivo incumpre así o prazo anunciado polo propio presidente Touriño no Parlamento, onde dixo que o polémico documento recibiría o visto e prace definitivo “antes do verán”.

A principal causa do atraso é a oposición do BNG a varias das novas granxas e das ampliacións previstas pola Consellaría de Pesca, nas mans dos socialistas; como adiantara hai unha semana ANT Diario.

De feito, Pesca presentou unha versión actualizada do Plano este martes na reunión semanal dos secretarios de todas as consellarías, xuntanza na que se deciden os temas que se aprobarán no Consello do xoves.

Tensión na reunión de secretarios xerais

Nunha longa reunión, o bando do Bloque da Xunta logrou botar para atrás o documento. A súa aprobación fica adiada, segundo fontes da parte nacionalista do Executivo, “até que haxa máis consenso”.

O certo é que este novo atraso converte ao Plano Acuícola nun motivo de preocupación para a parte socialista da Xunta. E é que o documento conta cunha forte oposición social, artellada nunha ducia de plataformas veciñais a través de Galiza non se Vende.

Aprobalo coa oposición do Bloque a poucos meses das eleccións autonómicas pode restar votos nuns comicios marcados ademais pola crise. Por iso, os colectivos ecoloxistas comezan a albergar a esperanza de que finalmente o Plano non se poña en marcha durante a presente lexislatura.

Instalacións rexeitadas polo BNG

Segundo explicou a ANT Diario o deputado Bieito Lobeira, os nacionalistas rexeitan a construción de catro novas factorías: 'Laxe Brava' en Corrubedo (Ribeira), 'Xandriña' en Camelle, 'Camelle' en Arou e 'Punta Orelludas' en Oia. O BNG tamén é contrario ás ampliacións da factoría de Mougás (Oia) –ameazada por unha orde de derrubo da propia Xunta– e Merexo (Muxía).

Vía > A Nosa Terra

A Fundación Comarcal O Baixo Miño presenta o libro “Orgulho galego na diáspora”, en Oia, o martes 29 de xullo

. 29 de julho de 2008
0 comentarios

A Fundación Comarcal O Baixo Miño presentará hoxe, ás 19 horas, na Casa do Concello de Oia, o libro “Orgulho Galego na Diáspora” – Conversa com Higino Martins Estêvez-.

Higino Martins, nado e residente en Bos Aires, mais galego de corazón e vocación, fillo de emigrantes procedentes das parroquias de Santa María de Oia e de Viladesuso, no concello de Oia, é un prestixioso intelectual, coñecido e recoñecido no plano internacional polos seus estudos lingüísticos, cos que ten defendido, con admirábel constancia e independencia, a lingua galega.

Con esta publicación preténdese dar a coñecer a súa figura, xa que a pesar de realizar unha importante actividade de divulgación do galego no exterior é un descoñecido, para o público en xeral, na nosa terra.

O devandito libro do que son autores Ângelo Gonçalves Vicente e Bernardo Penabade Rei, foi editado pola Fundación Comarcal O Baixo Miño co financiamento da Consellería do Medio Rural, Dirección Xeral de Desenvolvemento Rural, e a colaboración do Concello de Oia e a Asociaçom Galega da Língua (AGAL).

No acto de presentación intervirán os autores, Ângelo Gonçalves Vicente, nado e veciño de Oia, analista político, investigador, e Licenciado en Ciencias Políticas e da Administración, na Universidade de Santiago de Compostela; e Bernardo Penabade Rei, Licenciado en Filoloxía Galego-Portuguesa pola Universidade de Santiago, escritor, lingüísta e profesor no IES Perdouro de Burela.

Asemade contará coa presenza da Vicepresidenta da Fundación Comarcal do Baixo Miño e alcaldesa de Tomiño, Sandra González Álvarez, e representado ao Concello de Oia estará a súa concelleira de Cultura, Sandra Calvo Rodríguez.

Con este acto a Fundación Comarcal quere achegar a figura de Higino Martins aos veciños e veciñas do Baixo Miño.

A presión do BNG atrasa o Plano Acuícola

. 24 de julho de 2008
0 comentarios

O presidente da Xunta dixo en maio no Parlamento que o Plano Acuícola sería ratificado “antes do verán”. Con todo, o polémico documento non será aprobado no Consello da Xunta deste xoves e existen poucas posibilidades que reciba luz verde a próxima semana, ultima antes de que o Executivo marche de vacacións.

Touriño anunciou o prazo do verán en quente, no fragor dun debate con Núñez Feixóo na Cámara sobre a crise da pesca. Mais é evidente que o Plano acumula meses de atraso, pois o Executivo dixera inicialmente que estaría listo en xaneiro. Agora, a poucos meses das autonómicas pode converterse nun motivo de fricción no bipartito.

Lobeira explica que granxas o Bloque non acepta

De feito, fontes do sector explican que unha das causas do atraso é que o BNG non está disposto a apoiar un plano que autorice varias das novas granxas previstas. Consultado por ANT Diario, o deputado Bieito Lobeira confirma a oposición do BNG á construción de catro novas factorías: 'Laxe Brava' en Corrubedo (Ribeira), 'Xandriña' en Camelle 'Camelle' en Arou e 'Punta Orelludas' en Oia. Dúas delas afectan a Rede Natura, segundo a Memoria Ambiental da Consellería de Medio Ambiente.

Ademais, o Bloque é contrario ás ampliacións da factoría en Mougás (Oia) –ameazada por unha orde de derrubo da propia Xunta– e Merexo (Muxía). Neste último caso os nacionalistas cualifican a ampliación de “excesiva” malia que estarían dispostos a aceptar unha menor que incluíse as instalacións para as crías. O que non confirma Lobeira é se o BNG está disposto a levar a súa oposición até o punto de negar o seu respaldo no Consello da Xunta.

Oposición social

“Sabemos que o BNG está en contra da granxa de Corrubedo e doutras, o que non sabemos se están tan en contra como para bloquealo”, explica Manolo Santos, da plataforma Salvemos Laxe Brava. Para Santos, a causa do parón non é tanto a presión política dos nacionalistas como a “oposición social” das numerosas plataforma coordinadas no colectivo Galiza non se Vende.

En todo caso, Lobeira insiste en que foi a presión do Bloque o que levou á Xunta á eliminación de varios proxectos de novas plantas –caso da granxa ao carón do Castro de Baroña, que tivo un informe negativo da Consellería de Cultura– e varias ampliacións –como Punta Couso– da proposta inicial.

Os colectivos veciñais opostos ás granxas indican que o Plano está en 'stand by'. Incluso teñen a esperanza de que, de no aprobarse nos vindeiros meses, non saia adiante nesta lexislatura. “Tan cerquiña das eleccións dubido moito que se atrevan a aprobalo”, explica Luís Suárez, da asociación A Pergoliña de Camelle. Unha esperanza compartida por Xosé Manuel Casais, da plataforma de Quilmas, quen indica que “non creo que sexan tan kamikazes para aprobar antes das eleccións”.

Agricultura ecolóxica como alternativa

Casais é un dos promotores da Raíña Lupa, unha cooperativa de agricultura ecolóxica que montaron nos terreos en risco de expropiación. Segundo Casais a cooperativa conta co apoio da Consellería de Medio Rural, nas mans dos nacionalistas, e do Sindicato Labrego Galego, tamén próximo ao B NG. “Quen se vai a atrever a expropiar a unha cooperativa de 15 socios para cederlles os terreos a unha multinacional?” preguntase este activista.

Vía > A Nosa Terra

Reportaxe Subida a Oia de "Galicia Ras"

. 8 de julho de 2008
0 comentarios

agalega.info - Videos das noticias dos informativos da TVG

A Consellaría de Cultura afronta a recuperación das vellas pontes de Galiza

. 7 de julho de 2008
0 comentarios

Este plan permitiu xa a recuperación de pontes de época medieval en Mondariz, Ponteareas, Gutiriz, Tui e Palas de Rei.
A conselleira de Cultura e Deporte, Ánxela Bugallo, expuxo as características do Plan de Recuperación de Pontes Históricas, posto en marcha no segundo semestre de 2005. Desde entón a consellaría investiu 1.378.000 euros en reparar e consolidar oito pontes datadas entre os séculos XIV e XVII, entre as que están as tres actuacións que se executarán este ano en Noia, Becerreá e Teo. A estas hai que sumar as intervencións en seis pontes máis que está previsto realizar entre 2008 e 2009.

Ánxela Bugallo anunciou que se están facendo estudos previos e proxectos de execución para afrontar diversas actuacións entre este ano e o vindeiro en seis pontes históricas. Entre elas figuran varias construcións que sufriron nos últimos anos problemas debidos ás crecidas dos ríos. Unha delas é a Ponte Marzá, unha pontella tradicional sobre o río Mandeo, no concello de Curtis. Para esta construción está prevista unha actuación de reparación e de consolidación.

Ademais, está previsto intervir na Ponte Nafonso, ponte medieval que une Noia e Outes, para a que se están estudando as súas necesidades construtivas e de acondicionamento. Para a Ponte Cruzul (Becerrreá), do século XVIII, están previstos traballos de limpeza e consolidación. Na Ponte Vella de Monforte de Lemos (medieval) farase unha actuación de consolidación. E na antiga Ponte do Pozo Negro en Pontesampaio (Pontevedra), desaparecida polas riadas de 2006, estase realizando un proxecto para consolidar os restos que se conservan e facer un paso de nova construción. Tamén foi derrubada pola crecida do río a Ponte de Broi en Oia, unha construción de principios do XIX que Patrimonio estuda agora a posibilidade de reconstruír.

Na súa intervención, Ánxela Bugallo destacou a importancia de conservar e poñer en valor as pontes relacionadas cos camiños históricos, como calzadas romanas, vías de peregrinación e os chamados camiños reais. A conselleira sinalou que a súa importancia motivou a activación dun Plan de Recuperación de Pontes Históricas co que se está actuando en construcións deste tipo, principalmente de época medieval e moderna, e que en moitos casos teñen orixe galaico-romana.

Para Bugallo “este Plan de Recuperación supón un avanzo importantísimo na súa posta en valor das pontes e camiños históricos e vén demostrar que a nosa acción política ten por obxecto o desenvolvemento de programas integrais que permitan cambios cualitativos na consideración social da cultura e do patrimonio e a súa relación intensa e proveitosa coas dinámicas favorecedoras do desenvolvemento social e económico do noso país”.

O Plan de Recuperación de Pontes Históricas contou ata o de agora cun investimento de 1.378.480 euros. Deles, 739.062 investíronse entre o segundo trimestre de 2005 e o ano 2007 na recuperación de cinco pontes. Na da Cernadela (Mondariz) e a Ponte das Partidas (Ponteareas), do século XIV a primeira e XIV ou XV a segunda, realizáronse actuacións de limpeza e adecuación. Nas pontes medievais de San Alberte (Guitiriz) e do Louro (Tui) fixéronse reparacións estruturais nas que se afianzou a estabilidade das pontes. E no caso de Ponte Ferreira (Palas de Rei), tamén medieval, realizouse o proxecto de intervención e a reparación en colaboración co Xacobeo.

En 2008 repararanse tres novas pontes construídas entre os séculos XIV e XVII. Trátase da Ponte Gatín, en Becerreá, a Ponte de Traba en Noia e a ponte de Pontevea, no Concello de Teo. A Consellaría investirá 639.745 euros nos traballos de reparación e consolidación destas tres construcións.

Vía > Xornal

Un laboratorio de ideas nunha leira de Mougás

. 4 de julho de 2008
0 comentarios

Aida Gómez e Diego Vasko fan libros pero non son escritores. Xuntos forman o dúo artístico A Pluma Eléctri*k, que se adicou nos últimos tres anos a crear máis de 700 libros de artista. Trátase dun labor que mestura artesanía e arte e que permite converter en obras de arte portadas de libros que elaboran a man e que decoran con todo tipo de obxectos.

A Pluma Eléctri*k converteuse nun dos colectivos artistísticos máis influentes do barrio de Lavapiés en Madrid, aínda que moitas das súas ideas xurdiron nunha leira da parroquia de Mougás en Oia. Alí viven os avós de Diego e é onde acode con frecuencia como lugar de respiro artístico e para afastarse do bulicio de Madrid.

Precisamente un vídeo en galego gravado na leira de Mougás recibía ata fai uns días aos que acudían á exposición deste dúo na súa casa taller de Madrid. Alí exhibían algúns dos seus últimos libros de artista e as súas novas propostas. Comezan así un grupo de catro exposicións que renderá homenaxe aos elementos e que lles levará pronto a Eivissa, Bilbao e Barcelona. Por agora, onde non teñen previsto expor é en Galicia que se nos resiste bastante porque non hai un circuíto alternativo para a arte como si que ocorre, por exemplo, coa música», explica Diego. Ata hai pouco os seus libros podíanse comprar na librería do Marco pero agora os seus libros non se venden en ningún punto de Galiza aínda que nun futuro non moi afastado estarán nunha librería da Coruña.

Ata o momento crearon 726 libros nos que usaron todo tipo de tecidos e pinturas pero tamén antigüidades, material informático e electrodomésticos estragados. Nos últimos meses propuxéronse novos retos como realizar intervencións artísticas en plena rúa. Reutilizan os obxectos que se van atopando, danlle unha visión artística e o inmortalizan co seu cámara, unha vez sinalizado con cinta azul e cun letreiro co nome da obra.





+ Vídeos

Vía > A Voz

Educación Viaria na Galescola de Oia

. 3 de julho de 2008
0 comentarios

Os nenos e nenas da galescola de Oia estiveron a realizar diferente tipo de actividades ao longo dunha semana relacionadas coa educación viaria.

Como motivación contouse na aula o conto: “Os bolechas queren saber como é a policía local”. Confeccionáronse sinais de tráfico utilizando para elo material de refugallo, e aprendeuse o seu significado na asemblea. Como complemento a estas actividades utilizáronse as novas tecnoloxías visualizando no ordenador diferentes vídeos educativos sobre o tema.

As familias pola súa parte tamén participaron nestas actividades educativas, achegando á clase diferentes materiais relacionados co tema: unha alfombra cun deseño dunha cidade con estradas, sinais, pasos de peóns, semáforos, institucións públicas,…; pequenas réplicas plásticas de sinais de tráfico; coches e motos de policía; e outros coches variados.


Como colofón á semana houbo unha visita moi especial na escola: A POLICÍA LOCAL de BAIONA, porque en Oia entre outra cousas tampouco temos policía local.

Vía > Galescola

Mellora no ciberespacio Oiense

. 18 de junho de 2008
0 comentarios

Por unha vez, un corte de teléfono en Oia foi una boa noticia para o concello. Isto pasou a semana pasada cando moitos dos usuarios de liñas telefónicas do noso concello notamos deficiencias no servicio, eran debidas ás melloras nas nosas liñas. Telefónica fixo realidade a sua promesa de equiparar o prezo e a velocidade do ADSL rural ao urbano a partir do mes de xuño para cumprir coa orde dada pola Comisión do Mercado das Telecomunicacións.

O adsl rural xa non e a única opción de adsl fixa no concello. Nas liñas que non soportan a velocidade de 3 Mb ofrecida como base nas ciudades tan só ofertan ata 1Mb de velocidade a un prezo de 29.95 incluindo chamadas sendo o prezo de 39.95 no caso de ofrecer ata 3Mb nas liñas que si o soportan.

Iso si, a picaresca da compañía consiste en seguir facturando o adsl como adsl rural ós usuarios que así o tiñan contratado ata o momento, polo que compre chamar a telefónica para cambiar de modalidade e aumentar a velocidade e baixar o prezo.

Vía> OiaWifiXa

Selección de bolseiros/as de Turismo en Oia

. 9 de junho de 2008
1 comentarios

O concello de Oia selecciona dous bolseiros/as para traballar na caseta de turismo desde o 1 xullo ata o 30 de setembro.

Desde hoxe día 9 de xuño está aberto o prazo para a presentación de instancias para participar como bolseiro/a na caseta de turismo do Concello.

As solicitudes dirixiranse ao alcalde-presidente do concello, ata o luns, 23 de xuño, ás 13.00h. No modelo figuran as BASES, que tamén se poderán consultar no taboleiro de anuncios.

Vía > GaliciaSuroeste

A Xunta cubrirá cunha rede propia o rural sen ADSL

. 6 de junho de 2008
0 comentarios

A Consellería de Industria planea lanzar unha rede WIMAX propia para levar a alta velocidade ás aldeas que a ADSL Rural de Telefónica –subvencionada polo Estado a través do PEBA– non cubriu. É un proxecto de grande envergadura para o que hai un orzamento estimado de 77 millóns.

A gran novidade é que se trata dunha rede propia, propiedade da Xunta. O servizo será xestionado mediante concesións e non será gratuíto, pero si a un prezo similar ao da alta velocidade nas cidades.

Neste intre, a Consellería está a ultimar a elaboración do Mapa de Infraestruturas de Telecomunicación. En base a este Mapa, a Xunta identificará as zonas sen cubrir e a tecnoloxía a empregar en cada lugar. En todo caso, parece que o WIMAX, un sistema sen fíos, será a solución máis usada.
Precedentes en 12 municipios
O obxectivo é que o proxecto comece a aplicarse antes final de ano. Industria prevé aproveitar a experiencia da ducia de redes sen fíos municipais que xa están en marcha grazas ás subvencións deste departamento. Neste intre o servizo funciona ou está a piques de comezar en Boborás, Calvos de Randín, Castrelo de Miño e Manzaneda en Ourense; Ponteareas, Tomiño, Cuntis en Pontevedra; Curtis, Muxía e San Sadurniño na Coruña e Pol, Ribeira de Piquín, Riotorto e Mondoñedo en Lugo.
O novo plan pasa por estender o servizo a outros concellos nos que a cobertura da ADSL Rural de Telefónica non está a dar os resultados previstos. De feito, os 77 millóns previstos proveñen dun préstamo do Estado, que deixará que as Comunidades Autónomas xestionen directamente unha nova fase do PEBA, o Plan de Extensión da Banda Larga que lanzou o Ministerio de Industria e que debía rematar, en principio, dentro dentro de catro meses.
Protestas ante os datos irreais do Estado
O certo é que varias autonomías abriron un fronte de protesta contra ao Estado pois consideran insuficientes os resultados do Plan, que en Galiza supuxo cuantiosas subvencións a Telefónica para que mellorase a súa rede no rural e puidese así ofrecer ADSL en máis zonas. Helena Veiguela, directora xeral de Promoción Industrial e Sociedade da Información, foi das máis activas en reclamar que fosen as autonomías as que xestionasen por si unha nova fase do PEBA.

Finalmente o Ministerio cedeu e cada autonomía disporá dos cartos para aplicar a solución que consideren máis axeitada.

Cómpre ter en conta que nos últimos meses aumentou a ofensiva política do BNG ante os datos de cobertura do PEBA. Así o senador nacionalista Xosé Manuel Pérez Bouza vén de alertar que as cifras oficias do Ministerio de Industria son irreais, pois “consideran que un núcleo de poboación está cuberto cando en realidade trátase dunha cobertura parcial, co que arredor do 20 por cento da poboación destes núcleos segue sen posibilidades de acceder á banda larga”. É dicir, Telefónica dá por completado o servizo nunha zona cando a realidade é que moitos veciños seguen sen poder acceder a internet de alta velocidade.200.000 galegos illados da rede

Ademais, o Parlamento de Galicia reclamou hai uns meses por unanimidade que a banda larga teña o mesmo prezo e velocidade nas aldeas e nas cidades. O promotor da iniciativa, o deputado Fernando Blanco Parga, cifrou en 200.000 os galegos que aínda non poden acceder ao ciberespazo con banda larga. Pola contra, o ministro de Industria, Miguel Sebastián, afirmou a semana pasada nas Cortes que o PEBA xa cubría o 99% dos dos municipios.

Duplicidade de esforzos públicos?

En todo caso, a rede propia da Xunta pode chocar con outra iniciativa pública, anunciada pola Deputación de Pontevedra. O seu presidente, o conservador Rafael Louzán, comprometeu acometer, se fose preciso en solitario, a implantación no rural de acceso a internet en todas as areas rurais da provincia.

Vía > A Nosa Terra

Noventa concellos carecen de banda larga

.
0 comentarios

A deputada do PPdeG Susana López Abella denunciou esta mañá no Parlamento, usando datos da propia Xunta, que noventa municipios do país aínda carecen de acceso á internet de alta velocidade. A directora xeral de Sociedade da Información cifrou nun 85 por cento os galegos que teñen acceso á alta velocidade.

Helena Veiguela, responsábel da política de novas tecnoloxías da Xunta, lembrou que “a Xunta de Galicia non ten competencias en materias de telecomunicacións”, polo que non pode obrigar ás operadoras a prestar máis servizos que os mínimos fixados nas leis estatais.

Así, lembrou que os sucesivos gobernos de Madrid evitaron concretar a velocidade mínima de acceso internet, polo que hoxe é na práctica de 56 kb. por segundo, insuficiente para facer uso efectivo das capacidades multimedia da rede.

O mellor dos escenarios previstos

López Abella denunciou que o Galimap, sistema de información xeográfica da Xunta, recolle que noventa municipios –a maioría no interior de Lugo e Ourense– aínda non teñen acceso á rede de alta velocidade. De seguido, lembrou que o Estado prometeu que o cen por cento da poboación tería acceso á alta velocidade en 2008. Veiguela replicoulle que a extensión actual da banda larga en Galiza –85% da poboación segundo a Consellería de Industria– cumpre o escenario máis optimista fixado no PEGSI, o Plan de novas tecnoloxías do Executivo.

Chantada

A deputada conservadora reclamou información sobre a extensión de Redes WIMAX na comarca de Chantada, ao que a directora xeral respondeu que non había ningunha iniciativa específica.

Veiguela usou datos da iniciativa estatal PEBA –que en Galiza subvenciona a Internet Rural de Telefónica– para indicar que nesta comarca hai 1.300 cidadáns –sobre un total de 10.000– que non poden acceder a rede. Con todo, explicou que a terceira fase do Plan PEBA fará chegar o ADSL a 40 novos núcleos a 700 persoas este ano.

Vía > A Nosa Terra

Proxecto: Oia espallada

. 30 de maio de 2008
0 comentarios

"Oia Espallada" é o novo proxecto de OiaCeive e consiste en facer o mapa da emigración que padece o noso Concello.

Se estas emigrado non dubides porte en contacto con nós, para formar deste proxecto colectivo, a través do noso e-mail oiaceive@gmail.com

Se coñeces a alguen que neste momento viva fora do Concello de Oia e ti penses lle pode interesar formar parte do proxecto "Oia Espallada", tampouco dubides en facerlle saber que existe este proxecto.

Os Datos, que nos consideramos básicos para formar parte de "Oia Espallada", son os seguintes:

-Nome
-Foto
-Lugar actual de residencia
-Motivos polos que emigraste

Agardamos que vos pareza un proxecto interesante, en todo caso se vos parece unha perda de tempo tamén nos gustaria sabelo. Ficamos a espera de respostas da emigración oiense.


O BNG reclama banda ancha de calidade para todo o rural galego

. 29 de maio de 2008
0 comentarios

O senador do BNG, Xosé Manuel Pérez Bouza, considera “irreal” a cifra de 99% de núcleos de poboación do rural galego que dispoñen de cobertura de internet de banda larga, “algo que pode contrastar calquera cidadán intentando contratar acceso a internet no rural”.

Pérez Bouza preguntoulle esta mañá no Pleno do Senado ao ministro de Industria, Turismo e Comercio, Miguel Sebastián, pola “cobertura real” de poboación en zonas rurais e illadas de Galiza que garante o Goberno dentro do Plan de Extensión de Banda Ancha (PEBA) para o presente 2008.

Lembroulle que faltan uns 5 meses para que conclúa o PEBA , unha iniciativa do Ministerio de Industria, Turismo e Comercio que en Galiza está a executar Telefónica para “estender a cobertura de banda ancha ás zonas rurais e illadas onde non existe unha oferta con condicións similares ás dispoñíbeis nas zonas urbanas” e subliñou, con 28.741 núcleos de poboación contemplados, Galiza conta co 49,46% das zonas do Estado obxectivo do PEBA.

O ministro asegura que o 99% da poboación do rural galego ten cobertura para acceder a internet de banda larga

Na súa reposta o ministro de Industria asegurou que Telefónica “está cumprindo as tres condicións que marcamos: cobertura en todos núcleos de poboación de Galiza, chegando como mínimo ao 90% da poboación, e cumprir as condicións de prezos e técnicas marcadas”.

Neste sentido, informou de que “dos 28.806 núcleos de poboación galegos incluídos no Plan PEBA, no 99,8% cumpriuse o obxectivo, achegando a cobertura de internet de banda larga a 313 municipios e a 1,2 millóns de habitantes, o que supón o 99,4 % da poboación” obxectivo.

Engadiu ademais que se abrirá unha nova convocatoria –Fase III do PEBA- para 1.908 núcleos de zonas diseminadas. O ministro concluíu asegurando que “o Estado Español é o país da Unión Europea con máis cobertura de internet no medio rural”.

“Visión triunfalista que non se corresponde coa realidade”

Para o senador do BNG a resposta do Ministro de Industria “ten un ton triunfalista que non se corresponde coa realidade, xa que Telefónica non cumpra ningunha das tres condicións marcadas no Plan PEBA”.

Así, lembroulle que “Telefónica considera que un núcleo de poboación está cuberto cando en realidade trátase dunha cobertura parcial, co que arredor do 20% da poboación destes núcleos segue sen posibilidades de acceder á banda larga”.

Denunciou tamén que “a calidade do servizo que se ofrece é inferior á das áreas urbanas e a custo maior para os usuarios”. Así, os servizos de ADSL rural permiten un ancho de banda de só 512 kb , mentres que o WIMAX e Satélite só de 256 kb.

“O BNG esixe ao Goberno que obrigue a Telefónica a cumprir coas condicións establecidas”

Ademais, lembrou que os clientes do servizo ofertado a través do PEBA non teñen posibilidades, en moitos casos, de contratar outros servizos, como pode ser o DUO, que son en gran medida tractores da extensión do uso da banda longa. “E todo isto -subliñou- por un prezo de 39 € mensuais aos que lle hai que engadir o prezo da liña e o IVE”.

“En Galiza moitos núcleos de poboación do rural seguen sen ter cobertura de internet, e cando a teñen é de calidade inferior e a un prezo inferior á das zonas urbanas. O BNG esixe que o Goberno obrigue a Telefónica a cumprir coas condicións establecidas: acceso á banda larga en todos os núcleos incluídos no Plan PEBA, cun ancho debanda non inferior a 1 Mb, cun prezo non superior a 40€ mensuais e que permita contratar servizos como o DUO”, concluíu o senador do BNG.

Vía > Asociación de Internautas