Os nenos e nenas da Galescola de Oia aprenden a importancia de coidar a auga

. 8 de abril de 2008

A Asemblea Xeral da ONU declarou o Ano 2008, Ano Internacional do Saneamento. Polo tanto, o Día Mundial da Auga 2008, que se celebrou este ano o xoves 20 de marzo, fixo énfasis nas cuestións relacionadas co saneamento. A Galescola de Oia decidiu contribuír tamén a concienciar aos/ás alumnos/as da importancia que ten coidar a auga.
Así na asemblea falouse da mellor maneira de conservala, dos seus diferentes estadíos, do seu sabor e cor e da súa utilidade (regar, beber, lavar, etc.).
O seguinte foi un traballo por recantos, onde os/as nenos/as experimentaron, manipularon e gozaron coa auga e Ao final dos obradoiros, en vez de tirala, botouse a auga nos caldeiros da limpeza para utilizala para limpar o chan.
En diversos recantos da escola as crianzas puideron experimentar coa auga, nun deles púxose auga fría, morna e xeo; os/as nenos/as metían as súas mans e contaban ás persoas educadoras o que sentían, mentres que noutro recanto probaron a facer burbullas.
Por outra parte, na mesa de auga era posible investigar con diferentes materiais e descubrir que algúns flotan, como a esponxa e a madeira, e outros afúndense, como as pedras e a plastilina, e, mediante a utilización das novas tecnoloxías os nenos e nenas tiveron a ocasión de visualizar un conto interactivo sobre o ciclo da auga.
Ademais, realizouse un pequeno experimento na aula. A auga é transparente pero é posible darlle cor. Neste caso con papel crespón de cor azul, os/as nenos/as quedaron abraiados/as vendo a trasformación que sufría a auga en canto lle botabamos os anacos de papel.

Fonte: Galescola de Oia

Vía > InfoRosal